பிள்ளையார் விரதங்கள் பல உள்ளன. அவற்றுள் வினாயகர் சஸ்டி விரதம் அல்லது பிள்ளையார் பெருங்கதை விரதம் என்பது முக்கியமானது. கார்த்திகை விளக்கீடு பற்றி யாவரும் அறிவர். கார்த்திகை விளக்கீடு வந்து அடுத்தநாள் வரும் தேய்பிறை முதல் நாள் தொடக்கம் தொடர்ந்து மார்கழியில் வரும் வளர்பிறை ஆறாம் நாள் வரையான 21 நாட்களும் பிள்ளையார் சஸ்டி விரத நாட்கள் எனப்படும் அதில் முதல் 20 நாட்;களும், ஒரு பொழுது மட்டும் உணவு உட்கொண்டு 21 ம் நாள் உபவாசமிருந்து 22 நாள் பாரணம் செய்து உபவாசத்தை முடித்தல் வேண்டும். பிள்ளையாரை வணங்கி ஆண்களாயின் வலது கையிலும் பெண்களாயின் இடது கையிலும் 21 இழைகளினால் ஆன காப்பினைக் கட்டி விநாயகரை வணங்குதல் வேண்டும். இவ்விருபத்தொரு நாளும் விநாயகர் புராணம் எனப்படும், பார்கவபுராணத்தையோ, விநாயகர் அகவல், வினாயகர் கவசம், காரியசித்திமாலை போன்ற இசைப்பாடல்களை பாராயணம் செய்தோ அல்லது மற்றவர் படிப்பதைக் கேட்டோ, அல்லது அவர்களுடன் சேர்ந்து பொருள் விளங்கிப் படித்தாலோ உங்கள் தீமைகள் அகன்று நல்ல பலன்கள் கிட்டும். விநாயகர் புராணம் (பார்க்கவபுராணம்)

ஐங்கரன் அருளைப் பாடுதல் இன்பம்
அவன் புகழ் தினமும் கேட்டலும் இன்பம்
பூமியில் மானுட ஜென்மமெடுத்த
உமையைத் திருமணம் சிவனார் புரிந்து

அழகுறு சிவனும் தளர்வுறா உமையும்
கரியுடல் கொண்டு கலந்தது இன்பம்
அதனில் பிறந்த கரிமுகன் தோற்றம்
கொம்பையுடைத்துக் கயமுகன் அழித்திட

அசுரனை மூடிக வாகனம் ஆக்கி
வல்லபை மணந்த கணபதி வணங்கி
ஆவணித் திங்கள் சதுர்த்தி நன்நாளில்
சதுர்த்தி விரதம் நோற்றல் இன்பம்

மகிழ்வுடன் ஆடிய குண்டுக் கணபதி
தோற்றம் கண்டு எள்ளிய மதியிலாத்
திங்களை வெகுண்டு சபித்தல் கண்டு
தேவரும் கார்த்திகை நோற்றதும் இன்பம் 

கார்த்திகைக் கார்த்திகைக் கழிந்த பின்னாளில்
இருபத்தோரிழை இன்புறக் கட்டி
ஒருவேளை உண்டி உண்டு ஒருமனத்துடனே
பிள்ளையார் கதையைப் படித்தலும் இன்பம்

தேவகி மைந்தன் உரைத்தது கேட்டு
பாண்டவர் நோற்று வென்றது இன்பம்
அறுமுகன் பிறப்பும் சூரன் முடிப்பும்
அழகு குஞ்சரியை திருமணம் கொண்டதும்

அமராவதியை நீங்கிடல் கேட்டு
அன்னை பார்வதி துயரமடைந்து
பொய்க்கரியுரைத்த மாலினைச் சபித்துப்
பைந்தள் பாம்பாய் கணபதி உறையும்

ஆலின் அடியில் உழன்றிடும் வேளை
கணபதி விரதம் நோற்றதால் மாலும்
தன்னுரு மீண்டதைப் படித்தலும் இன்பம்
சினந்த கவுரியைக் கபாடம் திறக்க

சிவனும் நோற்றுச் சிறந்ததும் இன்பம்
பார்வதி நோற்றுப் பாலனை மீண்டும்
தன்மடி சேர்த்து மகிழ்ந்தது இன்பம்
இலக்கண சுந்தரி இன்னல்படவே

அவளும் நோற்று மகிழ்ந்தது இன்பம்
இன்பம் இன்பம் இனியவன் திருக்கதை
தினமும் ஓதிடச் சேர்ந்திடும் இன்பம்
எல்லாம் தந்திடும் பிள்ளையார் கதை இன்பமே!